而家全球變暖，一年熱過一年，今年香港真係熱到連非洲人都話熱。除左氣候問題，我都知大家最關注嘅莫過於點樣去消暑㗎啦。一講起要解暑，第一時間一定會諗起雪糕凍飲，但食得多又會肥，真係頭都暈埋……所以，為左你地嘅福祉，今日就等我推薦啲健康又低卡路里嘅消暑食品俾你地啦！
1. 乳酪
100g嘅原味乳酪，卡路里大概得100至130，大約等於一到兩粒方糖。仲要含有豐富嘅鈣質、蛋白質同埋益生菌，促進腸道健康，健康非常。
2. 豆腐花
豆類製品不嬲都係優質嘅蛋白質來源，所以大熱天時食碗凍豆腐花，都真係幾正。當然，前提係你記得落少啲紅糖同埋糖水阿。又或者如果想再健康啲，可以試下用無糖豆漿代替糖水，都一樣咁好食㗎！
3. 蒟蒻麵
除左甜品之外，要消暑其實都可以從正餐着手㗎喎！冇錯，就係冷麵啦，仲要係蒟蒻嗰隻，一聽都感覺到健康！
蒟蒻冷麵係由魔芋植物度提煉出嚟，有95%係水份，另外就係膳食纖維，講健康佢真係健康到爆。當其他粉面飯一人食用份量有200卡路里，蒟蒻麵都淨係得幾十卡路里！下次熱到冇胃口嘅時候，不妨考慮下食蒟蒻冷麵吖，雪凍黎食真係又消暑又好味，仲要一拆即食，煮都唔使煮，非常方便！
KATAOKA - 低卡日本蒟蒻麵(和風)：https://reurl.cc/V16LOA
KATAOKA - 低卡日本蒟蒻麵(中華風)：https://reurl.cc/GEVA6v
4. 涼粉、冰粉、愛玉凍
涼粉、冰粉、愛玉凍三樣都係熱量比較低嘅消暑甜品，佢地入口冰涼、香甜、嫩滑、彈牙，仲有生津解渴，清熱降火嘅功效添！大家仲可以配埋新鮮生果同埋天然嘅蜜糖嚟食，一方面可以有多啲膳食纖維，二嚟可以用天然糖分取代市面上經加工嘅糖，咁就可以更加健康喇。
5.冷凍生果
雪凍嘅生果都係對抗暑氣嘅一大法寶！幻想下，喺熱到暈暈地嘅時候，咬一啖冰菠蘿/西瓜，酸甜冰凍，即刻醒哂啦！不過唔係隻隻生果都屬於低卡路里㗎，如果想要食得健康，就要認住西瓜、蜜瓜、木瓜、哈蜜瓜同士多啤梨呢五款生果，佢地每100g只係得30幾卡路里，食多少少都唔怕！
延伸閱讀：
健康之選 - 無麩質低卡蒟蒻麵：https://reurl.cc/7pXkzy
