每次BBQ燒烤、打邊爐，最吸引嘅其中一樣嘢，莫過於喺一個充滿燒肉香、湯底香嘅環境，一邊聞住呢啲香氣，一邊啖啖肉，簡直係視覺同味覺嘅雙重享受。享，受之後，相信你都唔想你嘅衫褲鞋襪吸晒味，成個星期都聞住呢陣「香」味㗎嘛。所以，以下落嚟嘅小貼士可能就好幫到你喇！
BBQ燒烤 / 火鍋後如何除味?
1. 保持空氣流通
「香」味其實大多數都係揮發性物質或氣體，我哋用嚟打邊爐/燒烤嗰啲燃料喺燃燒嘅時候都容易產生不同帶有氣味嘅物質。所以，選擇通風良好嘅地方，例如靠近窗口、露台、風口位，可以讓氣流帶走有味物質同氣體，減少佢哋依附喺衫上、傢俬或者俾我哋吸入嘅機會。
2. 利用天然除臭劑
唔想等自然風乾? 咁可以選擇用水稀釋白醋，並將佢噴喺有味嘅傢俬 / 衣物上。除此之外，你亦可以將泡過嘅茶葉曬番乾，擺喺屋企唔同角落去吸味亦得。
3. 用熨斗除味
如果BBQ燒烤 / 打邊爐後，件衫啲味真係好難清除的話，可以試試將一條濕毛巾扭乾，然後將呢條微濕嘅毛巾擺喺件衫上面。之後，用熨斗隔住毛巾熨一熨件衫。咁樣衫上嘅氣味就會俾條毛巾吸哂，以達致除臭效果。
4. 用空氣清新劑/除臭噴霧
呢個應該係最直接嘅方法，只要直接利用空氣清新劑/洗衣物除臭噴霧，喺有油煙或有食物味道嘅衫/地方上面噴幾下，就可以好快消除到異味。不過記得記得，唔好用太濃味/太香嘅清新劑，如果唔係就……你明嘅。
用以上方法，以後就唔驚喺屋企瘋狂打邊爐 / BBQ燒烤啦！