情人節首選就梗係鋸扒啦! 但市面上咁多款牛扒應該點樣選擇? 除咗最常見有西冷牛扒同牛肉眼扒，仲有近年新興嘅牛板腱扒。而咁多款牛扒你又知唔知有咩分別呢? 睇埋落去同你一一拆解。
西冷牛扒位於牛隻嘅後腰脊部位，脂肪比例較低 (8.5%) ，油花不算多，但分佈平均，肉味比牛肉眼扒濃郁，口感有嚼勁，屬於減肥人士嘅恩物，因為西冷牛扒於牛扒當中脂肪比例較少。建議熟成度唔超過5成。
牛肉眼扒位於肋脊部位，脂肪比例較高 (22%) ，油花豐富，肉味比西冷淡但口感軟腍。牛肉眼扒油脂較豐富，建議熟成度為5-7成。烹調時可加入蒜頭、百里香、迷迭香等香料，除咗可以增加味道層次，亦可降低油膩感覺。
牛小排扒位於牛胸腹上方，一般成長條狀，中間連著一根筋，其脂肪比例較高 (26%) ，含豐富的大理石油花，建議熟成度為7成至全熟，將多餘油分煎出，口感將更佳。因為牛小排油脂豐富，所以對於唔擅長掌控火喉嘅廚房新手亦都可以輕鬆煎出美味牛扒。在烹調過程中，牛小排扒可能會因為中間嘅筋而分成兩半，不過屬正常現象。
牛板腱扒位於肩胛骨上方，一隻牛只可以取出約2公斤嘅牛板腱，所以屬稀有部位。而牛板腱最明顯嘅特徵係扒中間帶有一條透明肉筋，因為肩胛位置係經常活動嘅部位，脂肪比例較低 (9%)，筋多、肉質結實，蛋白質含量係四種牛扒當中最高的，因此近年極受健身人士嘅喜愛。
如果你係追求軟嫰口感的話，首選肉質軟腍嘅牛肉眼扒; 廚房新手怕煎壞塊扒，可以選擇牛小排扒；如果你係減肥或健身人士但又想鋸扒，則推薦低脂高蛋白質嘅西冷牛扒或者牛板腱扒。
希望睇完以上呢篇文章，可以幫到你按照個人需求選擇適合自己嘅牛扒，然後製作出最啱口味嘅美味牛扒。
延伸閱讀：
【情人節必睇】千萬別做！六大煎牛扒錯誤處理方法
